Banditët vrasin gjashtë dhe rrëmbejnë më shumë se 100 persona në shtetin Zamfara të Nigerisë
Persona të armatosur vranë të paktën gjashtë persona dhe rrëmbyen më shumë se 100 të tjerë, përfshirë gra dhe fëmijë, në një sulm ndaj komunitetit Kairu në shtetin veriperëndimor Zamfara të Nigerisë, tha të premten një ligjvënës vendas.
Zamfara është epiqendra e sulmeve nga bandat e burrave të armatosur rëndë, të njohur në vend si banditë, që kanë shkaktuar kaos në të gjithë veriperëndimin e Nigerisë në vitet e fundit, duke rrëmbyer mijëra, duke vrarë qindra dhe duke e bërë të pasigurt udhëtimin me makinë ose në ferma në disa zona.
Banditët sulmuan Kairu rreth orës 10:40 të premten, duke qëlluar pa dallim, tha për Reuters në telefon Abubakar Isa, një banor, gruaja e të cilit u rrëmbye.
Hamisu Faru, një ligjvënës vendas, e konfirmoi sulmin për Reuters, duke thënë se sulmuesit morën “jo më pak se 100 persona, përfshirë gra dhe fëmijë”.
“Ndërsa po ju flas tani, ata po kontrollojnë shtëpi më shtëpi, duke rrëmbyer njerëz”, tha Faru në telefon.
Një banor tjetër, Mohammed Usman, tha se sulmuesit e rrethuan qytetin për gati dy orë para se të merrnin pengjet e tyre. Mijëra banorë tani janë larguar nga fshati, tha ai, shkruan Reuters.
