Bartja e mjeteve buxhetore, Trafiku Urban del me reagim
Ndërmarrja e Trafikut Urban ka dalë me reagim pas bartjes buxhetore të miratuar të premten nga Asambleja e Prishtinës.
Trafiku Urban ka paralajmëruar se pa u shlyer obligimet ndaj furnitorëve nuk mund të rifillojë operimin normal.
“Në radhë të parë shprehim keqardhje të thellë për shqetësimet dhe vështirësitë që po ju shkaktohen nga pezullimi i transportit publik. E dimë sa i rëndësishëm është ky shërbim për lëvizjen tuaj të përditshme”, thuhej në reagimin e Trafikut Urban.
“Megjithëse sot Kuvendi Komunal ka votuar bartjen e mjeteve buxhetore nga viti 2024, duhet theksuar qartë se këto mjete mund të bëhen të përdorshme vetëm pas transferimit të tyre nga institucionet qendrore. Deri në realizimin e këtij hapi, N.P.K. “Trafiku Urban” SHA mbetet në pamundësi financiare për të shlyer obligimet ndaj furnitorëve, e rrjedhimisht edhe për të rifilluar operimin normal”, thuhej më tej.
Trafiku Urban ka bërë thirrje për përshpejtim të të gjitha procedurave.
“Për këtë arsye e shohim të arsyeshme dhe të domosdoshme që të gjitha institucionet përgjegjëse, përfshirë ministrinë përkatëse, të përshpejtojnë të gjitha procedurat e transferimit, në mënyrë që ndërmarrja të mund t’i kthehet menjëherë shërbimit publik”, thuhej në komunikatën për media.
“Deri në përmbushjen e këtyre obligimeve, dhe për sa kohë mbetet e pamundur të rifillojmë operimin, protesta e paralajmëruar nga punëtorët e Trafikut Urban do të vazhdojë. Me të bërë të qasshme mjetet financiare, shërbimi i transportit publik do të rikthehet pa asnjë vonesë”, thuhej në reagim.
“Gjithashtu, i njoftojmë qytetarët se për të gjitha biletat mujore të paguara, do të kompensohen ditët në të cilat shfrytëzuesit nuk kanë mundur të përdorin shërbimin e transportit. Faleminderit për mirëkuptimin tuaj”, thuhej në fund.
