Drenasi fton të prekurit nga vërshimet të paraqesin kërkesat për kompensim

Komuna e Drenasit ka njoftuar qytetarët e prekur nga vërshimet që të paraqesin sa më parë kërkesat e tyre pranë Komisionit Komunal për Vlerësimin e Dëmeve.

Sipas njoftimit të Komunës, paraqitja me kohë e kërkesave është e domosdoshme në mënyrë që komisioni të mund të nisë procesin e verifikimit dhe vlerësimit të dëmeve në afatin më të shkurtër të mundshëm. Autoritetet komunale theksojnë se kërkesat duhet të jenë të plota dhe të shoqëruara me të gjitha të dhënat e nevojshme.

Dokumentacioni duhet të dorëzohet në sportelet e Komunës së Drenasit, ndërsa nga komuna bëhet e ditur se institucionet lokale mbeten të përkushtuara për të qenë pranë qytetarëve dhe për të trajtuar me përgjegjësi çdo kërkesë të paraqitur në këtë situatë.