“PO VINË DARDANË”, POEZI NGA HALIL MATOSHI

ecja nëpër rrugët me gurë
të lëmuet të Romës së lashtë
âsht rrëshqitje lezëm e kohës
përmi ashtin tonë

gurët ata nemitun t’japin
imazhe për fëmijë që luejn n’sokak
t’rive tue u puthë n’gjysmë errësinë
darsmash e funeralesh
dhe pijanecësh që bâjnë tetëshe

ishte kohë e lumtun
njerëz gazmorë ishin nisë
në tempuj filozofë e hokatarë
ecshin p’ej shpie

ia behu lufta rreknimi
gurët e lëmuet u skuqen
krenat ranë
n’mbrojtje t’qytetit nga plebejë
me nam

ia behu pikëllimi
darsmat u nalën
tempujt u braktisën
u çelën gropa masive
ra muzgu

me ag u panë njerëz me ftyra t’përlloquna dizga plagësh
e damarë gufue si thupra lejthie
tue majtë kafka e tesha t’përgjakta luftarësh t’dekun n’robni

ishin dardanë t’zânun rob
t’përmendun për t’mramën herë
në vitin 97 para Krishtit

dolën nga historia

Ata po vinë Tetëmdhetë
gjallë
nga nji rrobë sollen p’ej syrgjyni
t’bashkëluftëtarëve t’ramë
nânat mas erës njohën bijtë e tyne
dhe vaji u përzie me gzim

dikur fellë në t’ardhmen
kur m’i gurët e lëmuet kâmë romaku nuk shkilte mâ
dikun rreth vjetëve 1968
u rishfaqën dardanët n’histori

ndjeu Roma për namin e tyne
dhe u erdhi në ndihmë me avionë lufte më 1999 mas Krishti

rob kthehesin p’ej shpie 

çelën vorre t’reja
ngritën sh’pia t’reja
masanej lindën shumë thmi
ndërtuen Katedralë t’re
ligjnimesh kunorëzimesh kremimesh

u panë n’Prishtinë
po ata njerëz me plisa t’namun
veç emnin kishin t’vjetër

fëmijë që luejn n’sokak
t’ri tue u puthë n’gjysmë errësinë
darsma e funerale
dhe pijanecë që bâjnë tetëshe
e pshurrin skej mureve t’qytetit
t’shkujdesun

dëshmi raportet e Antonio Russo* 
dardanët u kthyen p’ej shpie

——

*Antonio Russo (3 qërshor 1960 – 16 tetor 2000) ishte reporter që publikoi në shtypin italian të vërteta për luftën e Kosovës 1998-1999.
Ai vritet në Luftën e Dytë Çeçene, në vitin 2000.