“Qeveria i qet parët”, Murati thotë se shpërblimi prej 500 mijë euro për “Dardanët” do të miratohet të hënën

Ministri i Ekonomisë, Hekuran Murati, ka njoftuar se shpërblimi prej 500 mijë euro për lojtarët e Kosovës, i cili ishte premtuar nga kryeministri Albin Kurti, do të miratohet në të hënën.

Në profilin e tij në Facebook, ai ka treguar se vendim do të miratohet në mbledhjen e Qeverisë.

“Mirëmëngjes fitues! Me kërkesë të Kryeministrit, vendimin për ndarjen e shpërblimit prej 500k euro për fitoren e mbrëmshme të Dardanëve do ta kemi gati për miratim të hënën në mbledhje të Qeverisë”, ka shkruar ai.

Mbrëmë, pas fitores së Kosovës ndaj Sllovakisë, ka qenë kryetar i Prishtinë, Përparim Rama, i cili ia ka rikujtuar Kurtit këtë premtim.

Derisa ka postuar një fotografi nga stadiumi në Bratisllavë, në profilin e tij në “Facebook”, ai ka shprehur kërkesën e tij për kryeministrin.

“Qiti paret Kryeminister Albin Kurti!”, ka shkruar ai.