Vetura godet për vdekje një këmbësor 74-vjeçar në Skenderaj
Një aksident trafiku me pasoja fatale ka ndodhur sonte rreth orës 21:10 në rrugën “Azem Bejta” në Skenderaj.
Në aksident janë përfshirë një veturë dhe një këmbësor, ku si pasojë e përplasjes ka humbur jetën në vendin e ngjarjes këmbësori, rreth 74-vjeçar.
Lajmin për TandemPress e ka konfirmuar zëdhënësi i Policisë për rajonin e Mitrovicës, Avni Zahiti, i cili bëri të ditur se drejtuesi i automjetit është shoqëruar në Stacionin Policor për procedura të mëtejme.
“Njësitet relevante policore, përfshirë hetuesit e aksidenteve të trafikut, kanë dalë në vendin e ngjarjes dhe janë duke zhvilluar hetime për të sqaruar shkaqet dhe rrethanat e këtij aksidenti”, tha ai.
