Ganimete Musliu: Dhimbja për Sinan Dautin nuk falet, drejtësia duhet të vijë

Deputetja Ganimete Musliu ka reaguar me një mesazh prekës pas rivarrimit të eshtrave të një fëmije të vrarë gjatë luftës në Kosovë.

Në një postim, Musliu ka kujtuar Sinan Dautin, i cili ishte vetëm 9 vjeç kur u vra gjatë luftës dhe u gjet pas 27 vitesh. Ceremonia e lamtumirës u mbajt në Prekazi i Epërm, një vend që mbart simbolikë të thellë historike dhe dhimbje kolektive për shqiptarët e Kosovës.

“Sa të thella i ke plagët, Drenicë…”, shkroi Musliu, duke theksuar se humbja e një fëmije në rrethana të tilla nuk është vetëm tragjedi familjare, por plagë e gjithë vendit.

Ajo kujtoi se Sinani duhej të jetonte një fëmijëri të zakonshme, me lojëra dhe ëndrra, por jeta e tij u ndërpre në mënyrë mizore gjatë luftës.

Deputetja u shpreh se kjo dhimbje nuk mund të harrohet dhe se padrejtësitë e së kaluarës nuk duhet të mbeten pa përgjigje.

Në fund të mesazhit të saj, ajo i dha lamtumirën fëmijës me fjalët: “Pusho i qetë Sinan, të qoftë i lehtë dheu i Kosovës. LAVDI!”