Komuna e Suharekës ka shpenzuar mbi 1 milion e 81 mijë euro për ekzekutimin e vendimeve gjyqësore gjatë nëntë muajve

Komuna e Suharekës ka regjistruar mbi 1.08 milion euro pagesa për ekzekutimin e vendimeve gjyqësore gjatë periudhës janar–shtator 2026. Sipas raportit financiar të komunës, pjesa më e madhe e këtyre mjeteve është evidentuar në kategorinë e investimeve kapitale, me mbi 781 mijë euro. Ekzekutimi i vendimeve gjyqësore, përfshirë detyrimet që mund të burojnë nga kontratat kolektive, vazhdon të ngrejë çështjen e ndikimit të këtyre pagesave në financimin e projekteve komunale

Komuna e Suharekës ka shpenzuar mbi 1 milion e 81 mijë euro për ekzekutimin e vendimeve gjyqësore gjatë nëntë muajve të parë të vitit 2026, duke prekur disa prej kategorive kryesore të buxhetit komunal, përfshirë investimet kapitale.

Kjo rezulton nga raporti financiar i administrimit të buxhetit të Komunës së Suharekës për periudhën janar–shtator 2026, të cilin e ka analizuar Urgjent.com.Sipas tabelës së vendimeve gjyqësore të ekzekutuara deri më 30 shtator, shuma e përgjithshme arrin në 1,081,111.55 euro, nga të cilat 781,512.31 euro janë evidentuar në kategorinë e investimeve kapitale.

Në kategorinë e shpenzimeve komunale janë regjistruar 159,961.23 euro, në subvencione dhe transfere 124,344.51 euro, ndërsa në mallra dhe shërbime 15,293.50 euro.Këto shifra tregojnë se ekzekutimi i vendimeve gjyqësore ka zënë një pjesë të konsiderueshme të mjeteve të raportuara si investime kapitale, kategori nga e cila zakonisht financohen rrugët, objektet publike dhe projektet e tjera infrastrukturore.

Në raportin financiar, projekti me kodin 00040 – “Ekzekutimi i vendimeve gjyqësore (Neni 40 LMFPP)” figuron me 781,173.01 euro shpenzime.Kjo shumë përbën rreth një të katërtën e të gjitha shpenzimeve kapitale të komunës gjatë periudhës raportuese, të cilat kanë arritur në 3,060,083.88 euro.

Ndryshe nga projektet infrastrukturore, ky zë buxhetor nuk përfaqëson ndërtimin e një rruge, shkolle apo objekti të ri, por pagesa dhe regjistrime financiare që lidhen me ekzekutimin e vendimeve gjyqësore.

Cilat projekte figurojnë në të njëjtën pasqyrë buxhetore?

Raporti financiar tregon se, gjatë nëntëmujorit, Komuna e Suharekës ka realizuar 250 mijë euro shpenzime për ndërtimin e objektit të zjarrfikësve në Shirokë, 117,849.50 euro për ndërtimin e minifushave të futbollit në Bllacë, Savrovë, Studençan, Shirokë, Mushtisht dhe Gjinoc, si dhe 99,999.99 euro për ndërtimin dhe rikonstruktimin e rrugëve lokale në Dubravë, Sallagrazhdë, Topliçan, Peqan dhe Suharekë.

Po ashtu, janë evidentuar 84,001 euro për instalimin dhe sanimin e ndriçimit publik në disa vendbanime, 76,358.49 euro për ndërtimin e kullës së dëshmorëve në Dobërdelan dhe 70,602.58 euro për ndërtimin e urave në Reçan, Reshtan dhe Bukosh.Në të njëjtën pasqyrë përfshihen edhe 53,025.62 euro për rikonstruktimin e shkollave në Sllapuzhan, Suharekë dhe Gjinoc, si dhe 49,999.99 euro për ndërtimin e impiantit të ujërave të zeza në Dubravë.

Megjithatë, dokumenti nuk identifikon se nga cili prej këtyre projekteve janë tërhequr konkretisht mjetet për ekzekutimin e vendimeve gjyqësore. Për këtë arsye, nuk mund të konstatohet vetëm nga raporti se një projekt i caktuar ka humbur një shumë të caktuar për shkak të përmbarimit.

Kontrata kolektive dhe detyrimet gjyqësore, Ekzekutimi i vendimeve gjyqësore ka qenë problem financiar për komunat e Kosovës edhe për shkak të kërkesave të punonjësve që burojnë nga marrëveshjet kolektive, përfshirë detyrimet për përfitime të ndryshme të përcaktuara në këto marrëveshje.

Me 24 korrik 2026 se, sipas raportit të mëparshëm financiar, Komuna e Suharekës kishte regjistruar 755,200.42 euro për ekzekutimin e vendimeve gjyqësore vetëm gjatë gjashtëmujorit të parë të vitit.

Raportimi i atëhershëm e kishte trajtuar ndikimin financiar të kontratës kolektive në buxhetin komunal.Megjithatë, raporti i ri nëntëmujor nuk e specifikon për secilën pagesë se cilit vendim gjyqësor i përket, kush është përfituesi apo nëse detyrimi buron nga kontrata kolektive. Për të përcaktuar shumën e saktë që lidhet me marrëveshjet kolektive, nevojitet regjistri i ekzekutimeve dhe dokumentacioni përkatës i lëndëve.

Mospërputhje edhe brenda raportit financiarNjë tjetër element që bie në sy është mospërputhja ndërmjet dy pasqyrave të raportit.Ndërsa tabela përmbledhëse e vendimeve gjyqësore paraqet 781,512.31 euro në kategorinë kapitale, lista e projekteve e evidenton kodin 00040 me 781,173.01 euro.Diferenca prej 339.30 eurosh është pranuar edhe në vetë raportin financiar, ku kërkohet harmonizimi i të dhënave me raportin burimor.

Në total, Komuna e Suharekës ka realizuar 17.71 milionë euro shpenzime neto gjatë nëntë muajve të parë të vitit, nga buxheti aktual prej 24.87 milionë eurosh.Të dhënat financiare tregojnë se pagesat sipas vendimeve gjyqësore kanë përbërë një barrë të konsiderueshme për buxhetin komunal.Mbetet të sqarohet se sa prej këtyre mjeteve janë ekzekutuar për detyrimet e kontratave kolektive, cilat janë kostot e procedurave përmbarimore dhe nëse për realizimin e pagesave janë zvogëluar apo ridestinuar mjete nga projektet konkrete infrastrukturore.