Një foshnjë u shpëtua nga një situatë potencialisht fatale në qytetin Corona të Kalifornisë, pasi u la vetëm në një makinë të mbyllur në temperatura ekstreme prej 43 gradë Celsius, shkruan Gazeta Sinjali.
Ngjarja ndodhi më 17 qershor dhe është dokumentuar nga kamerat e trupit të oficerëve të policisë që ndërhynë me urgjencë pas një telefonate alarmuese.
Sipas Departamentit të Policisë së Corona-s, oficerët mbërritën në vendngjarje dhe gjetën fëmijën në sediljen e pasme të automjetit me motor të fikur dhe dritare të mbyllura. “Duke parë rrezikun e menjëhershëm për jetën e foshnjës, oficerët përdorën një levë për të thyer xhamin dhe për ta nxjerrë fëmijën në siguri,” thuhet në njoftimin e policisë.
Pas shpëtimit, policët e mbajtën në krahë foshnjën dhe u përpoqën ta qetësonin, ndërsa i ofruan ndihmë të parë në vend.
Ende nuk është bërë e ditur sa kohë ka qëndruar fëmija brenda në makinë, ndërsa hetimet mbi rastin janë duke vazhduar.
Policia ka publikuar pamjet e incidentit për të rritur ndërgjegjësimin publik mbi rreziqet që sjell lënia e fëmijëve në automjete të mbyllura gjatë vapës së verës.
“Edhe pak minuta mund të jenë fatale për një fëmijë në këto kushte ekstreme,” paralajmëruan autoritetet.
