Hekuran Murati lajmëron se shërbyesit publikë që punojnë në organizata buxhetore do të marrin 55 euro shtesë në paga

Ministri në detyrë i financave Hekuran Murati, përmes një postimi në faqen e tij në Facebook, njoftoi qytetarët se duke filluar nga ky muaj shërbyesit publikë që punojnë në organizata buxhetore do të marrin 55 euro shtesë në paga.

Postimi i plotë:

Nga ky muaj e tutje shërbyesit publikë që punojnë në organizata buxhetore do të marrin pagën me rritje prej 55 euro shtesë.

Rritja e këtij muaji e kompleton rritjen e paraparë sivjet prej 110 eurove për secilin punonjës, e cila zbatohet në dy faza nga 55 euro – faza e parë nga janari 2025 dhe faza e dytë nga korriku 2025.

Kjo njëkohësisht përbën rritjen e 4-t të pagave në sektorin publik prejse kemi marrë mandatin, gjë që na bën Qeverinë e vetme që ka rritur pagat 4 herë brenda mandatit.

Rritja e parë në shkurt 2023 – hyrja në fuqi e Ligjit të Pagave.

Rritja e dytë në janar 2024 – rritja e koeficientit nga 105 në 110.

Rritja e tretë në janar 2025 – rritja prej 55 euro në muaj për të gjithë punonjësit.

Rritja e katërt në korrik 2025 – rritja prej 55 euro në muaj për të gjithë punonjësit.