Ministria konfirmon ndërrimin e foshnjave në Spitalin Amerikan 2: Evidentohen mangësi në identifikim

Ministria e Shëndetësisë ka konfirmuar se në rastin e ndërrimit të foshnjave në Spitalin Amerikan 2 në Graçanicë, të ndodhur më 18 mars 2026, janë evidentuar mangësi në procedurat e identifikimit dhe verifikimit të foshnjës gjatë dorëzimit te nëna, shkruan TandemPress.

Në një përgjigje për TandemPress, Ministria e Shëndetësisë, në bashkëpunim me Inspektoratin Shëndetësor, ka bërë të ditur se rasti është inspektuar dhe gjatë kontrollit janë konstatuar parregullsi në procedurat e ndjekura.

“Inspektimi ka evidentuar mangësi në procedurat e identifikimit dhe verifikimit të foshnjës gjatë dorëzimit te nëna”, thuhet në përgjigjen e Ministrisë së Shëndetësisë për TandemPress.

Përveç këtyre mangësive, nga kontrolli i dokumentacionit është konstatuar se infermierja e përfshirë në rast, ndonëse kishte licencë të vlefshme pune, nuk ishte e deklaruar në sistemin e Departamentit të Licencimit dhe Akreditimit (DLA).

Ministria ka bërë të ditur se gjatë shqyrtimit të mënyrës së trajtimit të rastit janë evidentuar mangësi edhe në veprimet e zyrtarëve të Inspektoratit Shëndetësor.

Për këtë arsye, Kryeinspektori Shëndetësor ka ndërmarrë masa ndaj disa zyrtarëve.

Sipas përgjigjes së Ministrisë, inspektorja që e ka trajtuar rastin është referuar në Komisionin Disiplinor për shqyrtimin e shkeljes së dyshuar.

Ndërkohë, zyrtarit të arkivit i është shqiptuar vërejtje me shkrim, ndërsa përgjegjësit të Inspektoratit Shëndetësor i është dhënë vërejtje me gojë.

Në përgjigjen e saj për TandemPress, Ministria e Shëndetësisë ka shprehur keqardhje për pasojat që rasti ka shkaktuar te familja e prekur.

“Ministria shpreh keqardhje për shqetësimin dhe pasigurinë e shkaktuar familjes së prekur”, thuhet në përgjigje.

Tutje, Ministria ka bërë të ditur se institucionet përgjegjëse do të monitorojnë zbatimin e masave dhe rekomandimeve të dala nga trajtimi i rastit.

Rasti i ndërrimit të foshnjave ngre shqetësime për zbatimin e procedurave të sigurisë dhe identifikimit të të porsalindurve, si dhe për mbikëqyrjen e punës së institucioneve shëndetësore.

TandemPress do të vazhdojë të përcjellë zhvillimet lidhur me këtë rast.