‘Ujkut’ ia ulën dënimin, por paralajmëruan edhe burgime të përjetshme: Çka ndodhi dje në Hagë?

Gjykata e Apelit të Speciales ia ka ulur për 5 vjet dënimin Pjetër Shalës, i njohur si ‘Ujku’. Nga 18 vjet sa ishte dënuar, ai do të vuajë 13 vjet burg.
Problemi më i madh që u gjet nga gjyqtarët e Apelit, ishte se në shkallën e parë, pati gabime të mëdha në shqiptimin e dënimit.
Megjithatë, në këtë pjesë, gjyqtari i Apelit, Kai Ambos, paralajmëroi se Gjykata Speciale mund të shqiptojë edhe dënime me burgim të përjetshëm. Kjo në kundërshtim me dënimet në Kosovë, ku dënimi më i madh për krime të luftës është 15 vjet burg.
“Paneli i Apelit gjykon se duke pasur parasysh aktgjykimin e Gjykatës Kushtetuese në rastin Mustafa, shakllëzimi më i butë i dënimit sipas legjislacionit vendor është 5 deri në 15 vjet burgim në pajtim me Kodin Penal të Jugosllavisë, të ndryshuar me rregulloren e UNMIK-ut. Sido që të jetë ky shkallëzim i dënimit sipas kodit vendor, nuk kufizon Gjykatën Speciale të jap dënim më të lartë, deri në burg të përjetshëm. Paneli nuk gjykon se është bërë shkelje e parimit të ligjshmërisë lidhur me dënimet. Së dyti, në lidhje me faktorët që u morën parasysh, Paneli i Apelit, gjykon se z.Shala nuk evidentoi gabime dhe rrëzon kundërshtimet me to. Sa i takon argumentit të z.Shala se ai nuk kishte rol udhëheqës në FMK, Paneli i Apelit konstaton se trupi gjykues gaboi kur nuk i dha peshë se z.Shala nuk kishte rol komandues në vrasjen e paligjshme. Paneli rrëzon të gjitha pretendimet e tjera për faktorët lehtësues”, tha gjyqtari, raporton Nacionale.
Sipas vendimit të Apelit, gjyqtarët në shkallën e parë kanë keqpërdorur diskrecionin duke dhënë dënim tejet të lartë.
“Z.Shala vlerësoi se trupi gjykues nuk garantoi barazi, dhe nuk dha dënim proprocional. Paneli rrëzon se trupi gjykues nuk dha mendim të arsyetuar. Sa i takon themelësisë së ankesës, Paneli rikujton se është i vetëdijshëm për diskrecionin në dhënien e dënimit. Duke marrë parasysh të gjithë faktorë, Paneli gjykon se ka mospërputhje me dënimin e z.Shala dhe dënimeve të tjera të analizuara prej tij. Dënimi i formës me 15 vjet për z.Mustafa që kishte pozitë komanduese, tregon se në këtë rast trupi gjykues tejkaloi kufijtë e diskrecionit të vet, duke thënë dënime jashtë proporcionit të arsyeshëm. Paneli miraton pjesërisht kundërshtimet për masën e dënimit dhe rrëzon pjesën tjetër të argumenteve. Trupi gjykues keqpërdori diskrecionin e tij duke thënë dënime joprocionale. Paneli e konsideron të arsyeshme të ul dënimet. Paneli i Apelit thekson se ulja e dënimeve nuk sygjeron aspak se krimet për të cilat është dënuar nuk janë të rënda”, u tha më tutje.
Aktgjykimin gjyqtari e shqiptoi në emër të popullit të Kosovës, dhe në fund, deklaroi se kinse nuk po dënohet populli e as UÇK-ja.
“Paneli i Apelit thekson se as UÇK-ja, as populli i Kosovës nuk ishin objekt i këtij procesi, dhe ata nuk janë gjykuar përgjegjës apo shpallur fajtor për këto krime”, tha ai.
Pjesa më e madhe e kundërshtimeve të Shalës, u rrëzuan. /Nacionale/