Një person ndalohet për 48 orë në Leposaviq, dyshohet për nxjerrje të kundërligjshme të dokumenteve zyrtare
Një person është ndaluar për 48 orë në Leposaviq, nën dyshimin për përfshirje në nxjerrjen e kundërligjshme të dokumenteve zyrtare të Republikës së Kosovës që lidhen me regjistrimin civil.
Sipas njoftimit të Policisë së Kosovës, i dyshuari me inicialet R.M. shfrytëzonte një kioskë në Leposaviq, ku ofronte shërbime për servisimin e telefonave celularë.
Pas pranimit të informatave nga Hetimet Rajonale të Drejtorisë Rajonale të Policisë në Mitrovicën e Veriut, zyrtarët policorë kanë kryer kontrolle në këtë lokacion, me asistimin e Njësisë Rajonale të Forenzikës.
Gjatë kontrollit, policia ka sekuestruar përkohësisht pajisje elektronike dhe dokumente të ndryshme, të cilat dyshohet se kanë rëndësi për hetimin e rastit.
“Lidhur me rastin, përveç dy personave të tjerë, është intervistuar edhe i dyshuari R.M., në prani të avokatit mbrojtës”, thuhet në njoftimin e Policisë së Kosovës.
Pas shqyrtimit të rrethanave të rastit, Prokurori i Shtetit ka nxjerrë aktvendim për ndalimin e të dyshuarit për 48 orë.
Policia ka bërë të ditur se rasti do të trajtohet nga Njësia për Hetimin e Krimeve Ekonomike dhe Korrupsionit në Mitrovicën e Veriut, në koordinim me Prokurorinë Themelore në Mitrovicë.
Hetimet lidhur me rastin janë në vazhdim, ndërsa i dyshuari prezumohet i pafajshëm derisa fajësia e tij të vërtetohet me vendim të formës së prerë nga gjykata.
