Sorensen: Po bëhet përparim në dialogun Kosovë – Serbi
Emisari i Bashkimit Evropian për dialogun Kosovë – Serbi, Peter Sorensen ka deklaruar se normalizimi i marrëdhënieve mes dy vendeve s’është proces që arrihet me një takim.
Në një intervistë për “Agenzia Nova” u shpreh se që nga marrja e mandatit në janar, kur e zëvendësoi Miroslav Lajçakun, ka zhvilluar dhjetëra takime zyrtare në rajon.
“Që nga marrja e detyrës, kam mbajtur më tepër se 60 takime zyrtare në rajon dhe kam qenë organizator i dy raundeve të takimeve të kryenegociatorëve në Bruksel, ku diskutuam çështje shumë konkrete: nga bashkëpunimi ekonomik e deri te çështja e personave të zhdukur gjatë luftës në Kosovë. Procesi nuk është gjithmonë linear dhe shumë prej tij ndodh prapa skenave, por çdo ditë bëhet përparim i vërtetë. Çdo ditë njerëzit, automjetet dhe mallrat lëvizin lirshëm mes Kosovës dhe Serbisë. Vetëm këtë verë, mbi 1.7 milion njerëz dhe afërsisht 650 mijë automjete kaluan pikat e përbashkëta kufitare. Veturat me targa të lëshuara nga Kosova tani mund të kalojnë në Serbi. Njerëzit paguajnë për energjinë që konsumojnë, sipas kushteve të dakorduara. Kjo është provë e prekshme se dialogu po funksionon”, tha Sorensen.
Emisari ka rikujtuar se dialogu i lehtësuar nga BE-ja është platforma e normalizimit të marrëdhënieve mes Kosovës dhe Serbisë dhe se rruga drejt integrimit në BE, për të dyja vendet, varet nga kjo.
Shtoi se përmes dialogut, Beogradi dhe Prishtina, “janë angazhuar në diskutime të drejtpërdrejta dhe kanë arritur mbi 90 marrëveshje që përfshijnë dispozita mbi çështje praktike të përditshme”.
“Këto janë rezultate që vitet e pranisë ndërkombëtare, duke përfshirë një numër të madh forcash paqeruajtëse, s’kanë mundur t’i arrinin vetëm”, tha Sorensen.
Emisari i BE-së shtoi se zgjerimi mbetet përparësi kyçe për Bashkimin Evropian.
“Plani i rritjes tregon angazhimin tonë për të ardhmen e rajonit, duke vendosur pritje të qarta. Për Serbinë dhe Kosovën, kjo do të thotë angazhim konstruktiv në normalizimin e marrëdhënieve të tyre”, tha Sorensen.
Sorensen ka folur edhe për zgjedhjet lokale në Kosovë të mbajtura më 12 tetor. Ka mirëpritur zhvillimin e tyre në frymë paqësore, konkurruese dhe gjithëpërfshirëse.
“Të gjitha komunitetet morën pjesë dhe mbulimi mediatik ishte i lirë dhe i drejtë, duke kontribuuar në një proces transparent. Pjesëmarrja në komunat me shumicë serbe ishte mesatarisht mbi 50 për qind, që është shenjë shumë pozitive…Serbët e Kosovës morën pjesë, dhe në nëntë komuna me shumicë serbe, partitë serbe fituan si vendet e kryetarëve ashtu edhe shumicën në këshillat komunale. Tani kemi përfaqësues të zgjedhur. Ky është një hap i rëndësishëm përpara, duke demonstruar se ata janë një pjesë integrale e shoqërisë së Kosovës. Dhe këto zgjedhje paqësore, dhe kthimi i kryetarëve të bashkive, gjithashtu hapin rrugë për një diskutim më të gjerë mbi riintegrimin e serbëve të Kosovës që braktisën institucionet e Kosovës në vitin 2022”, tha Sorensen.
Emisari i BE-së po ashtu tha se pret angazhim konstruktiv nga udhëheqësit në rajon.
“Dialogu është pikërisht platforma në të cilën Kosova dhe Serbia mund t’i adresojnë mosmarrëveshjet me qetësi dhe konstruktivitet. Prandaj, ne i inkurajojmë si Kosovën ashtu edhe Serbinë që të përmbahen nga shkëmbimet publike për të shfrytëzuar plotësisht këtë platformë dhe të përqendrohen te zbatimi i angazhimeve të tyre të dakorduara në dialog”, tha Sorensen.
