Këshilli Gjyqësor i Kosovës (KGJK) ka filluar të mërkurën fazën e intervistimit me gojë për 56 kandidatët që kanë kaluar me sukses testin e parë kualifikues dhe testin me shkrim, për rekrutimin e 20 gjyqtarëve në gjykatat themelore të Republikës së Kosovës.
Përmes një komunikate, Këshilli ka premtuar një proces transparent dhe të drejtë, raporton “Betimi për Drejtësi“.
“Intervistimi përbën një hap kyç në procesin e përzgjedhjes, duke synuar vlerësimin e aftësive profesionale, integritetit dhe përgatitjes së kandidatëve për t’u bërë pjesë e sistemit gjyqësor. KGJK do të sigurojë një proces transparent dhe të drejtë, ku çdo kandidat trajtohet me barazi dhe profesionalizëm”, thuhet në njoftim.
“Në funksion të garantimit të një procedure të hapur dhe të besueshme, KGJK ka ftuar të gjithë akterët e interesuar për të marrë pjesë në monitorimin e këtij procesi. Megjithatë, në fazën aktuale ishin të pranishëm përfaqësuesit nga Misioni i Bashkimit Evropian për Sundimin e Ligjit në Kosovë (EULEX), si dhe aktivistja Flutura Kusari”, thuhet në njoftim.
Instituti i Kosovës për Drejtësi (IKD) ka monitoruar procesin e testimit nga fusha penale dhe civile të mbajtur me datë 19 respektivisht me 20 korrik 2025.
Po ashtu, IKD ka monitoruar edhe procesin e testit kualifikues të mbajtur me datë: 5 korrik 2025. /BetimipërDrejtësi
