Tejkaluan shpejtësinë, gjobiten katër ferizajas nga policia
Katër shoferë janë ndëshkuar nga policia për shkak të tejkalimit të shpejtësisë së lejuar në rrugën “Brahim Ademi” në Ferizaj.
Sipas njoftimit të organeve të rendit, patrulla e Njësisë së Komunikacionit Rrugor, gjatë kontrolleve të realizuara në këtë zonë ku kufizimi i shpejtësisë është 50 km/h, ka identifikuar katër drejtues mjetesh duke vozitur mbi normat e lejuara.
Ndaj tyre është shqiptuar nga një gjobë prej 200 euro, janë vendosur nga 2 pikë negative, si dhe u është shqiptuar masa mbrojtëse e heqjes së patentë-shoferit për 3 muaj.
Sipas policisë, personat e ndëshkuar janë:
B.S. (34 vjeç), i cili drejtonte një veturë Audi A4, ngjyrë hiri, me targa vendore, është ndaluar duke lëvizur me shpejtësi 103 km/h.
D.L. (33 vjeç), me veturë VW Golf, ngjyrë hiri, me targa vendore, është ndaluar me shpejtësi 87 km/h.
B.K. (35 vjeç), me veturë Land Rover, ngjyrë e zezë, me targa vendore, është ndaluar me shpejtësi 83 km/h.
Q.V. (37 vjeçe), me veturë Audi A4, ngjyrë hiri, me targa vendore, është ndaluar me shpejtësi 83 km/h.
Policia Rajonale e Ferizajt ka bërë të ditur se do të vazhdojë me kontrolle të rregullta dhe të intensifikuara me qëllim rritjen e sigurisë në komunikacion, duke apeluar tek të gjithë shoferët që të respektojnë rregullat e trafikut.
