MUNGON NË SEANCË Rozeta Hajdari refuzon t’i përgjigjet drejtësisë
Hajdari dhe të tjerët akuzohen se i kanë shkaktuar dëm rreth 3 milionë euro buxhetit të shtetit të Kosovës.
Ashtu sikurse shefi i saj, Albin Kurti, që e anashkalon drejtësinë duke mos iu përgjigjur ftesave për dëshmi, edhe Ministrja në detyrë e Industrisë, Ndërmarrësisë dhe Tregtisë, Rozeta Hajdari, nuk ka shkuar sot në seancën e parë të procesit për rezervat shtetërore, ku ajo është e akuzuar bashkë me tre të tjerë – dy zyrtarë të Ministrisë së Tregtisë dhe një biznesmen.
Si rezultat i mungesës së Hajdarit, seanca është anuluar. Seanca tjetër për këtë rast, është caktuar për 13 janar.
Hajdari, e cila tani është kandidate për deputete nga radhët e Vetëvendosjes, dy zyrtarët e ministrisë – Irfan Lipovica dhe Hafiz Gara – si dhe një biznesmen i afërt me pushtetin, Ridvan Muharremi, i njohur si Ridi, akuzohen se i kanë shkaktuar dëm buxhetit të shtetit rreth 3 milionë euro.
Kur aktakuza iu ngrit nga Prokuroria, Hajdari doli e foli duke akuzuar me emra prokurorët se kanë bërë gjoja përndjekje politike ndaj saj. Ajo edhe i akuzoi se kanë shkelur ligjet për sekret shtetëror.
Vendimin për shmangie të procedurave tenderuese për blerjen e rezervave shtetërore Hajdari e kishte marrë nga shefi i saj, Albin Kurti, i cili pasi ka refuzuar të flasë para prokurorisë pas disa ftesave për këtë aferë, është propozuar të thirret gjatë procesit shqyrtues.
Në një postim në Facebook, të martën, Hajdari publikoi një fotografi me Kurtin, me falënderimet për të për përkrahjen që ia ka dhënë.
Kur kishte dalë në pah afera e rezervave shtetërore, Kurti i kishte dalë në mbrojtje publikisht Hajdarit.
Ai, ndër të tjera, kishte theksuar se “kam besim të plotë në Ministren Rozeta Hajdari dhe në punën e saj”.
