Vushtrri: Arrestohen dy persona për vjedhje të rëndë

Policia e Kosovës në Vushtrri ka arrestuar edhe dy persona të dyshuar që ndërlidhen me veprën penale “vjedhje e rëndë”, ndërsa janë gjetur dhe sekuestruar edhe sendet e vjedhura.

Sipas njoftimit zyrtar, më 18 dhjetor 2025, pas vazhdimit të hetimeve për zbardhjen e plotë të rastit, hetuesit e Stacionit Policor në Vushtrri kanë identifikuar dhe arrestuar personin e dytë të dyshuar për këtë vepër penale.

Po ashtu, policia ka arritur të identifikojë edhe lokacionin ku ndodheshin sendet e vjedhura, me ç’rast janë sekuestruar njehsorët e ujit dhe është arrestuar edhe një person tjetër i moshës madhore.

Pas intervistimit dhe procedurave të nevojshme, ndaj personit të moshës madhore është iniciuar rast për veprën penale “Blerja, pranimi ose fshehja e sendeve të përfituara me kryerjen e veprës penale”. Me udhëzim të prokurorit, i dyshuari është liruar në procedurë të rregullt.

Ndërkohë, ndaj të dyshuarit tjetër, i cili është i mitur dhe dyshohet për kryerjen e veprës penale “vjedhje e rëndë”, me vendim të prokurorit i është caktuar masa e ndalimit policor prej 48 orësh.

Policia ka bërë të ditur se më herët, më 16 dhjetor 2025, ishte arrestuar edhe një i mitur tjetër për të njëjtin rast. Sipas hetimeve, i dyshuari në bashkëveprim me një person tjetër, i cili ende ndodhet në kërkim policor, dyshohet se ka kryer vjedhje të rëndë në një objekt ndërtimi, ku ishin vjedhur gjithsej 45 njehsorë uji.

Hetimet për këtë rast po vazhdojnë.