LDK-ja mohon se ka koalicion me PDK-në në Prishtinë, “godet” brendarreshtash Përparim Ramën
Lidhja Demokratike e Kosovës përmes një komuniakte për media ka mohuar të ketë marrëveshje koalicioni me Partinë Demokratike të Kosovës në Prishtinë.
Kjo pasi kryerari i PDK-së në Prishtinë, Uran Ismajli, njoftoi mbrëmë në “Pressing” të T7, se “po, ka koalicion” me LDK-në për bashkëqeverisje komunale dhe se, ky koalicion, “do të zyrtarizohet nesër.”
LDK-ja brendarreshtash goditi Përparim Ramën, kryetarn e Prishtinës nga radhët e tyre, “çdo marrëveshje tjetër nuk përfaqëson qëndrimin zyrtar të Lidhjes Demokratike të Kosovës.”
Komunikata e plotë:
LDK njofton opinionin publik se nuk ka asnjë marrëveshje me PDK-në dhe asnjë parti tjetër politike në Prishtinë për bashkëqeverisje. LDK nuk ka marrë pjesë në asnjë proces ndërpartiak për ndonjë marrëveshje bashkëqeverisëse politike deri më tani.
LDK ka strukturat e veta partiake, organet vendimmarrëse lokale dhe më gjerë; dhe këto struktura nuk kanë qenë pjesë e asnjë marrëveshjeje qeverisëse.
Çdo marrëveshje tjetër nuk përfaqëson qëndrimin zyrtar të Lidhjes Demokratike të Kosovës. Si e tillë, ajo nuk krijon obligime politike për LDK-në dhe nuk mund të konsiderohet si vullnet i organizuar i saj. Palët dhe subjektet e tjera politike e dinë shumë mirë se si ndërtohen marrëveshjet ndërpartiake me LDK-në; përmes strukturave zyrtare, transparencës dhe vendimmarrjes institucionale. Çdo përpjekje për ta anashkaluar këtë rrugë nuk përbën marrëveshje me LDK-në.
Për çështjet tjera lokale, LDK do të angazhohet pas zgjedhjeve nacionale. Në këtë fazë, LDK dhe anëtarësia e saj janë të angazhuar plotësisht në procesin e ringritjes së përbashkët. Asnjë agjendë tjetër nuk mund ta zbehë këtë përkushtim.
