Gjermania rrëzon ligjin për nënshtetësi të shpejtë
Bundestagu gjerman ka votuar të mërkurën për të hequr ligjin e shpejtë për shtetësinë, një nga ndryshimet më liberale të miratuara gjatë qeverisjes së mëparshme të Olaf Scholz-it. Vendimi vjen pas premtimeve të kancelarit aktual, Friedrich Merz, për ta bërë procesin e marrjes së shtetësisë më të rreptë.
Në votimin e mbajtur në dhomën e ulët të parlamentit, 450 deputetë votuan pro heqjes së ligjit, 134 kundër dhe dy abstenuan.
Merz, udhëheqësi i Kristian Demokratëve (CDU), e kishte bërë anulimin e disa prej reformave të shtetësisë të Scholz-it një nga premtimet kryesore të fushatës së tij. Megjithatë, pas marrëveshjes së koalicionit me Socialdemokratët (SPD), vetëm ligji për procedurën e shpejtë u vu në shënjestër për ndryshim.
“Një pasaportë gjermane duhet të jetë fundi i procesit të integrimit, jo fillimi i tij,” thuhet në programin e CDU-së, duke theksuar se qytetaria duhet të fitohet pas një periudhe të gjatë përshtatjeje dhe kontributi në shoqëri.
Ligji i miratuar në korrik 2024 nga qeveria Scholz kishte lehtësuar ndjeshëm rrugën drejt shtetësisë për emigrantët, duke e ulur periudhën minimale të qëndrimit nga tetë në pesë vjet dhe duke lejuar mbajtjen e shtetësisë së parë. Aplikantët duhej të dëshmonin njohuri të gjermanishtes në nivel të mesëm dhe aftësi për të mbajtur veten financiarisht, shkruan DW.
