Supremja refuzon ankesat e VV-së për votimin me asistencë në dy komuna
Gjykata Supreme e Kosovës ka refuzuar dy ankesat e Lëvizjes Vetëvendosje lidhur me votimin me asistencë në Malishevë dhe Han të Elezit në raundin e parë të zgjedhjeve lokale të 12 tetorit.
Në rastin e parë, kolegji gjyqësor e ka hedhur si të palejuar ankesën e paraqitur nga Lëvizja Vetëvendosje, kundër vendimit të Panelit Zgjedhor për Ankesa dhe Parashtresa të datës 17 tetor 2025, duke konstatuar se për të njëjtën çështje tashmë është vendosur nga kjo gjykatë me aktgjykimin e datës 23 tetor 2025, si dhe se për faktin se ankesa ishte parashtruar pas afatit të përcaktuar ligjor.
VV kishte kërkuar verifikimin e librave të votimit për Komunën e Hanit të Elezit, të ruajtur në Qendrën Komunale të Numërimit (QKN), të konstatojë se numri i lartë i rasteve të asistimit përbën shkelje të nenit 10 të Rregullores 12/2024 dhe të parimit të fshehtësisë së votës, të konstatojë se PZAP ka shkelur të drejtën për mjet efektiv juridik dhe proces të urdhërojë përsëritjen e votimit aty ku shkeljet janë të verifikueshme dhe ndikojnë në rezultatin përfundimtar të zgjedhjeve.
Në rastin e dytë, Gjykata Supreme e ka refuzuar si të pabazuar ankesën e Vetëvendosjes.
Supremja ka vlerësuar se vendimi i PZAP-së është marrë në përputhje me ligjin, duke konstatuar se ankesa e paraqitur nga subjekti politik LVV në PZAP, ishte e pasafatshme.
