Vdekja e 29-vjeçarit në objektin në ndërtim në Zubin Potok, 30 ditë paraburgim për të dyshuarin
Gjykata Themelore në Mitrovicë -Dega në Zubin Potok ka caktuar masën e paraburgimit prej 30 ditësh ndaj të pandehurit me inicialet B.B., lidhur me vdekjen e 29-vjeçarit Bajram Selimi, i cili më 1 shtator humbi jetën gjatë punës në një objekt në ndërtim në Zubin Potok.
Kërkesa për caktimin e paraburgimit ishte paraqitur nga Prokuroria Themelore në Mitrovicë, për shkak të dyshimit të bazuar se i pandehuri ka kryer veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.
Lajmin për media e ka konfirmuar Gjykata Themelore në Mitrovicë, duke bërë të ditur se ndaj të pandehurit është caktuar masa e paraburgimit në kohëzgjatje prej 30 ditësh.
“Të pandehurit B.B. i është caktuar masa e paraburgimit në kohëzgjatje prej 30 (tridhjetë) ditësh, për shkak të dyshimit të bazuar për kryerjen e veprës penale ‘Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës’”, thuhet në përgjigjen e gjykatës.
Sipas gjykatës, masa e paraburgimit llogaritet nga 1 shtatori 2026 dhe do të zgjasë deri më 1 tetor 2026.
29-vjeçari Bajram Selimi ishte rrëzuar nga objekti në ndërtim të stacionit policor në Zubin Potok dhe, pavarësisht se ishte dërguar në spital, nuk kishte arritur t’u mbijetonte plagëve.
