Policia konfirmon: 49-vjeçari humb jetën pasi ra nga një lartësi në Veternik
Një ngjarje e rëndë ka ndodhur sot rreth orës 10:00 në lagjen Veternik të Prishtinës, ku një 49-vjeçar ka humbur jetën pasi ka rënë nga një lartësi, derisa ishte duke punuar.
Lajmin për TandemPress e ka konfirmuar Flora Ahmeti, zëdhënëse e Policisë së Kosovës për Rajonin e Prishtinës.
“Viktima mashkull, 49 vjeç, nuk ka arritë të përballojë plagët dhe i njëjti në vendin e ngjarjes ka ndërruar jetë. Vdekjen e viktimës e ka konstatuar ekipi mjekësor në vendngjarje”, ka deklaruar Ahmeti për TandemPress.
Sipas Policisë, rasti ka ndodhur në një objekt në Veternik, ndërsa viktima ishte duke punuar në momentin e rënies.
Policia, në koordinim me Prokurorinë dhe Inspektoratin e Punës, ka nisur hetimet për të zbardhur rrethanat e plota të këtij rasti tragjik.
TandemPress më herët raportoi se viktima dyshohet të jetë Florent Rama, ndërsa për këtë detaj pritet konfirmimi zyrtar nga institucionet.
