Kryeministri në detyrë, Albin Kurti, ka ftuar për takim krerët e subjekteve politike, të shtunën (nesër), në orën 16:00.
Në ftesën përmes Facebookut, Kurti ka theksuar se aktgjykimi i Gjykatës Kushtetuese i shpallur dje nënvizon qartë se obligimi për konstituimin e Kuvendit u takon të gjithë deputetëve dhe jo vetëm subjektit të parë.
Ai ka shtuar se kjo iniciativë paraqet një përpjekje të radhës për arritjen e konsensusit për konstituimin e Kuvendit.
“Aktgjykimi i djeshëm i Gjykatës Kushtetuese thekson qartë se obligimi për ta konstituuar Kuvendin është obligim i të gjithë deputetëve dhe jo vetëm i subjektit të parë. Si kryetar i Lëvizjes VETËVENDOSJE! dhe në emër të grupit më të madh parlamentar të dalur nga zgjedhjet e 9 shkurtit 2025, sot u jam drejtuar të gjithë krerëve të subjekteve të përfaqësuara në legjislaturën e nëntë, me ftesë për takim të përbashkët të shtunën (nesër) në orën 16:00, në përpjekje të radhës në funksion të konsensusit për konstituim të Kuvendit”, ka shkruar Kurti.
