Heroina Telaku zgjidhet ambasadore e Kosovës në Kolumbi

Heroina Telaku është bërë ambasadorja e parë e Republikës së Kosovës, e akredituar në Republikën e Kolumbisë, pasi ka paraqitur zyrtarisht letrat kredenciale.

Lajmin e ka bërë të ditur vetë Telaku, përmes një postimi në Facebook, ku ka ndarë emocionet nga ceremonia dhe rëndësinë e këtij momenti për përfaqësimin diplomatik të Kosovës në këtë shtet të Amerikës Latine.

Ajo e ka cilësuar këtë ngjarje si një moment të veçantë në karrierën e saj diplomatike, duke theksuar se përfaqësimi i Kosovës mbetet një përgjegjësi dhe krenari e veçantë.

“Pavarësisht viteve në diplomaci, ndjenja kur përfaqësoj Kosovën mbetet po ajo. Sepse për mua, Kosova nuk është thjesht vendi që përfaqësoj, por një pjesë e pandashme e asaj që jam, e historisë sonë dhe e ëndrrave që kemi për të ardhmen”, ka shkruar Telaku.