Sekuestrohen gjashtë ekskavatorë në Prizren, Pejë dhe Rahovec për eksploatim të kundërligjshëm të zhavorrit

Inspektorati i Mjedisit ka zhvilluar një aksion përgjatë zonës së lumit Drini i Bardhë, ku ka identifikuar operatorë ekonomikë që po kryenin eksploatim të kundërligjshëm të zhavorrit.

Gjatë aksionit janë sekuestruar gjashtë ekskavatorë në Prizren, Pejë dhe Rahovec.

Në bashkëpunim me Policinë e Kosovës, në të gjitha mjetet janë vendosur shiritat zyrtarë të ndalimit të punimeve.

Lajmin e ka bërë të ditur ministrja e Mjedisit dhe Planifikimit Hapësinor, Fitore Pacolli, e cila ka theksuar se çdo shkelje do të trajtohet me seriozitet.

“Lumenjtë tanë nuk janë pronë e askujt për t’i shfrytëzuar kundërligjshëm. Çdo shkelje do të trajtohet me seriozitet dhe çdo veprim që dëmton pasuritë tona natyrore do të përballet me ligjin”, ka shkruar Pacolli.