Deklaratat e Osmanit për votimin kundër qëndrimeve të partisë, Mustafa: Ky ishte niveli i mjerë i Presidentes
Ish-kryeministri i Kosovës dhe ish-kryetari i Lidhjes Demokratike të Kosovës, Isa Mustafa ka komentuar arsyetimin e Presidentes, Vjosa Osmanit për mandatimin e Glauk konjufcës për kryeministër.
Mustafa thotë se Osmani u mundua ta shesë si vlerë demokratike “tradhtinë” që i bëri partisë së saj, LDK-së. Shton se këto deklarata tregojnë një “nivel të mjerë”
“E dëgjova dhe më la përshtypje! Mendova, si munden njerëzit që tradhtitë e tyre ndaj partisë që i ka ngritur dhe i ka bërë deputet të mundohen ti shesin si vlera demokratike për të tjerët. Ajo thjesht tha, unë e kam tradhtuar partinë time, i kam tradhtuar njerëzit që më kanë përkrahur dhe më kanë besuar. Kështu jam bërë presidente. Veproni edhe ju kështu dhe do të vlerësoheni dhe avancoheni nga VV-ja. Thjeshtë tregoi dhe predikoi që tradhtitë dhe mosdëgjueshmëritë brenda subjekte tjera të shërbejnë si kritere mbizotëruese për nominim të kandidatit të dytë për kryeministër. Ky ishte niveli i mjerë i Presidentes”, ka thënë Mustafa për Express.
Shton se nuk do ia zinte për të madhe presidentes Osmani nëse, qeveria e Kurtit, që sipas tij u formua mbi një tradhti t’i shërbente për të mirë Kosovës.
“Ndoshta s’do të ia kisha parë për të madhe, nëse “qeveria e shpresës” e cila zuri fill mbi këto sjellje t’i kishte shërbyer Kosovës për të mirë. Në të kundërtën, e katandisën vendin, e vunë nën sanksione ndërkombëtare, e shkelën Kushtetutën shumë herë, bllokuan shtyllën e drejtësisë dhe ushqyen korrupsionin”, ka thënë Mustafa.
“Krekosja se nuk e ka votuar kryetarin e partisë së saj ( ish partisë së saj) mund ti adresohet ndonjë mbeturine të mentalitetit të saj në LDK”, thotë ai.
Ish-kryeministri thotë se tendenca për shkatërrim nga brenda të subjekteve politike dhe konkurrencës demokratike është sulm ndaj vlera të shtetit.
