Babai sulmon djalin dhe i kanoset me armë në Shtime, arrestohet për 48 orë

Pasditen e së martës në fshatin Petrovë të Shtimes, një konflikt mes babait dhe djalit ka përfunduar me lëndime trupore dhe sekuestrim arme.

Ngjarja ka ndodhur dje, rreth orës 15:30, kur viktima, B.K., është paraqitur në Stacionin Policor në Shtime duke deklaruar se ishte sulmuar dhe kanosur nga babai i tij, T.K.

Sipas deklarimit, i dyshuari kishte përdorur dhunë fizike dhe kërcënime, duke shkaktuar lëndime të lehta trupore ndaj djalit.

Rasti është iniciuar për veprat penale “Lëndim i lehtë trupor” dhe “Mbajtje në pronësi, kontroll ose posedim të paautorizuar të armëve”.

Viktimës i është ofruar trajtim mjekësor, ndërsa rasti është trajtuar në prani të punëtorit të Qendrës për Punë Sociale.

Pas kësaj, njësia e hetimeve ka kontaktuar të dyshuarin, nga i cili është konfiskuar një pushkë gjuetie me katër fishekë.